حضرت ولی عصر تحقیقاتی مرکز  : محرم سے لے کر ذو الحجہ تک سارے مہینے خداوند متعال نے خلق کئے اور بنائے ہیں ، مگر فقط " ماہ رمضان " کو اس ذات اقدس نے اپنا مہینہ قرار دیا ہے ، اس کا مطلب یہ ہےکہ ضرور ماہ رمضان میں کچھ ایسی خصوصیات پائی جاتی ہیں ، جو دیگر مہینوں میں نہیں پائی جاتیں ، اور وہ خصوصیات وہی ہیں جنھیں خداوند رحیم و کریم کے آخری پیغمبر حضرت محمد مصطفی صلی اللہ علیہ وسلم نے خطبہ شعبانیہ میں نہایت بلیغ وحسین انداز میں بیان فرمایا ہے۔

آخر غرض کیا ہے ؟ کیوں اللہ عز و جل نے اس مہینہ کو اتنی خصوصیتوں اور عظمتوں کا حامل قرار دیا ھے اور آخر کیوں اسے " اپنا " بنایا ہے ؟؟

شاید اس لئے تاکہ ہم سب اس مہینہ میں " اس کے " بن سکیں ، یعنی " شہراللہ " میں ہم حقیقی و واقعی " عبداللہ " بننے کی سعادت سے ہمکنار ہوسکیں ۔

کیا کہنا ، سبحان اللہ ، شکراً للہ کہ اللہ عز وجل کی ذات اقدس نے اس " شہراللہ " میں ہمیں واقعی " عبد اللہ " بنانے کے تمامتر انتظامات فرمادیئے ہیں۔

اس مہینہ کا شہراللہ ، شہر الرحمہ ، شہر البرکہ ، شہر المغفرہ ، شہر التوبہ اور شہر الدعاء والمسئلہ ہونا ، کتنا عظیم اہتمام ہے ہمیں عبدصالح بنانے کا۔

یہ اذان فجر سے لے کر اذان مغرب تک کا مسلسل طاعت و عبادت سے بھرا طولانی سفر جس میں معینہ حرام ہی نہیں حلال چیزوں اور کاموں سے بھی اپنے پروردگار کی رضا کی خاطر بندہ پرہیز کرتا ہے بلاشبہ " عبد سازی " کا نہایت عظیم و دلنشین وسیلہ ہے ، کہ جس سفر میں بندہ بہ نام روزہ اپنے علی و عظیم مالک و پروردگار کا اتنا مطیع ہوجاتا ہے کہ اس کے حکم و فرمان کی تعظیم میں " اصل و شرب " جیسی نہایت ضروری لذید اور جائز چیزوں سے بھی دستکش ہوجاتا ہے ، اور اس کی ان چیزوں سے یہ دستکشی اس کے اندر یہ جوت جگانا چاہتی ھے کہ " اے بندہ خدا جب تو ماہ رمضان میں مسلسل ایک مہینہ اپنے خالق و مالک کی رضا کی خاطر ضروری اور حلال و جائز غذاؤں ، لذتوں اور کاموں سے بیگانہ ہوجاتا ہے تو کیا بقیہ مہینوں میں محرمات سے پرہیز نہیں کرسکتا ؟

بلاشبہ جو بندہ حلال و جائز اشیاء و اعمال سے ایک مہینہ کی مدت تک پرہیز کرتا ہے ، وہ بقیہ مدت عمر میں حرام اشیاء و اعمال سے بدرجہ اولیٰ بچ سکتا ہے۔

یہی وہ " عبدیت ساز " سبق ہے جسے ہر بندہ کو اس ماہ خدا سے حاصل کرنا ہے ، کہ جس کے دن تمام دنوں سے ، جس کی راتیں تمام راتوں سے اورجس گھنٹے اور لمحے تمام لحظات و لمحات سے افضل و برتر ہیں ، جس کے اندر ہمارا سانس لینا ، تسبیح پروردگار ہے تو سوجانا عبادت ، جس میں ہمارے اعمال مقبول اور دعائیں مستجاب ہیں اور قرآن کی ایک آیہ کریمہ کی تلاوت ، ختم قرآن کی تلاوت کا اجر و ثواب رکھتی ہے۔

بس اس عظیم الشان مہینہ کاواسطہ دے کر رب رحیم کریم سے بطفیل اہل بیت علیہم السلام دعا ہے کہ اے مالک و معبود جس طرح تونے ماہ رمضان کو اپنا بنایا ہے ، اسی طرح اس مہینہ میں ہمیشہ کے لئے ہمیں اپنابنا لے۔ آمین ثم الف آمین