الجزیرہ ٹی وی کے مطابق قطر کے امیر شیخ تمیم بن حمد آل ثانی نے سعودی عرب کے بادشاہ اور نام نہاد خادم الحرمین الشریفین کو خطے کی تباہی کا ذمہ دار قراردیتے ہوئے سعودی عرب پر قطر کی حکومت کا تختہ الٹنے کا الزام بھی عائد کیا ہے۔
امریکی ٹی وی سی بی سی کے پروگرام 60 منٹس میں بات کرتے ہوئے قطر کے امیر شیخ تمیم کا کہنا تھا کہ اب بھی قطر کے خلاف سعودی اتحاد کی فوجی کارروائی کا خطرہ موجود ہے۔ “مجھے خدشہ ہے اگر ایسا کچھ ہوتا ہے، اگر فوجی کارروائی ہوتی ہے تو یہ خطہ افراتفری کا شکار ہو جائے گا۔
سی بی سی کا یہ پروگرام اتوار کو نشر کیا جائے گا۔ شیخ تمیم بن حمد آل ثانی نے کہا کہ قطر نے سعودی عرب کی تمام گھناونی سازشوں کو ناکام بنادیا ہے جس امریکہ پر سعودی عرب کو ناز تھا وہ امریکہ اب قطر کے ساتھ بھی ہے۔
امیر قطر کی امریکی ٹی وی سے گفتگو پر متحدہ عرب امارات کے وزیر خارجہ نے شدید تنقید کرتے ہوئے کہا ہے کہ قطر کو مغربی میڈیا کے سامنے اپنی تنہائی پر شور مچانے کے بجائے دہشت گردوں کی حمایت ترک کردینی چاہیے اور 4 عرب ممالک کے مطالبات پر عمل کرنا چاہیے۔ ادھر قطر کے امیر نے سعودی عرب پر قطر کی حکومت کا تختہ الٹنے کا الزام بھی عائد کیا ہے۔
